Azərbaycan dövlətçiliyinin əsas dayaqları – Konstitusiya və suverenlik – xalqımızın əsrlərlə davam edən mübarizəsinin bəhrəsidir. 1991-ci ildə müstəqilliyin bərpası, 1995-ci ildə isə Azərbaycan Respublikasının Konstitusiyasının qəbul olunması milli dövlətçiliyimizin tarixi mərhələsini yaratdı. 2025-ci ilin ölkəmizdə “Konstitusiya və Suverenlik İli” elan olunması xalqımızın hüquqi düşüncəsinin və milli şüurunun daha da güclənməsi baxımından xüsusi rəmzi əhəmiyyət daşıyır.
Ümummilli Lider Heydər Əliyevin dediyi kimi: “Müstəqillik hər bir xalqın, hər bir millətin ən böyük sərvətidir. Azərbaycan xalqı bu sərvətə nail olub və onu qoruyub saxlamaq bizim ən ali vəzifəmizdir.”
Azərbaycan Respublikasının Konstitusiyası yalnız hüquqi sənəd deyil, həm də dövlətçilik fəlsəfəsinin təcəssümüdür. 1995-ci ildə ümumxalq səsverməsi ilə qəbul edilən bu ali qanun dövlət müstəqilliyini və ərazi bütövlüyünü təsbit etdi, hakimiyyət bölgüsü prinsipini möhkəmləndirdi, insan hüquq və azadlıqlarını ali dəyər kimi tanıdı, hüquqi, demokratik və dünyəvi dövlət quruluşunu təsdiqlədi. Heydər Əliyevin sözləri ilə:
“Azərbaycan Respublikasının Konstitusiyası bizim dövlətçiliyimizin, müstəqilliyimizin əsas qanunverici təminatıdır. Bu Konstitusiya xalqımızın azad iradəsinin təntənəsidir.”
Suverenlik sadəcə siyasi atribut deyil, həm də milli kimliyin qorunması, xalqın öz gələcəyi üzərində söz sahibi olmasıdır. Onun təməl istiqamətləri siyasi, iqtisadi, mədəni-mənəvi və hüquqi sahələri əhatə edir. Ulu Öndər bu barədə qeyd etmişdir: “Azərbaycan öz milli sərvətlərinin sahibidir. Bizim iqtisadiyyatımız, siyasətimiz, mədəniyyətimiz yalnız xalqımızın maraqlarına xidmət etməlidir. Bu, dövlət suverenliyimizin əsas şərtidir”.
2025-ci ildə bu ilin xüsusi adla qeyd olunması təsadüfi deyil. Bu təşəbbüs Konstitusiya biliklərinin gənc nəslə aşılanmasına, dövlət müstəqilliyinin dəyərinin cəmiyyətə daha dərindən çatdırılmasına, hüquqi mədəniyyətin inkişafına və dövlətçilik ənənələrinin möhkəmləndirilməsinə xidmət edir. Heydər Əliyev dəfələrlə vurğulamışdır:
“Azərbaycanın dövlət müstəqilliyi əbədi və dönməzdir. Heç bir qüvvə xalqımızı bu yoldan döndərə bilməz”.
Konstitusiya və suverenlik bir-birini tamamlayan ali dəyərlərdir. Konstitusiya dövlətin hüquqi sütunu, suverenlik isə onun siyasi-mənəvi dayağıdır. 2025-ci ilin “Konstitusiya və Suverenlik İli” elan edilməsi həm tarixi yaddaşın möhkəmləndirilməsi, həm də gələcək nəsillərə müstəqillik iradəsinin ötürülməsi baxımından mühüm bir hadisədir.
Şəki Şəhər Statistika İdarəsinin rəis müavini Rəhim Rəhimli
